Finfinnee fi magaalota naannolee adda addaa keessatti gamoo mataa isaa ijaaruun kan beekamu Baankiin Awaash, gamoo ammayyaa abbaa darbii 4 Mootummaa Naannoo Oromiyaa Godina Baalee magaalaa Roobeetti ijaaruun bakka qondaaltotni mootummaa olaanoon argamanitti eebbisiiseera.
Hojii gaggeessaan olaanaa baankichaa obboo Tsahaay Shifarraa sirna eebbaa kanarratti akka ibsanitti gamoon kun kan ijaarame magaalaa guddoo Godina Baalee kan taate, faayidaa diinagdee olaanaa kan qabu harkisa turizimii fi oomishtummaadhaan kan beekamtu magaalaa Roobee keessatti yeroo ta’u, bakki itti ijaarames daldalaa fi sochii diinagdee adda addaatiif bakka barbaadamaa ta’uu isaatiin biyyaafis akkasumas naannochaaf faayidaa diinagdee guddaa akka qabaatu ibsaniiru.