አዋሽ ባንክ ከ3.3 ቢሊዮን ብር በላይ አተረፈ::

በመጪው ህዳር የብር እዮበልዩውን ለማክበር በዝግጅት ላይ የሚገኘው አዋሽ ባንክ በ2011 የሒሳብ ዓመት ከታክስና ከሌሎች ተቀናሾች በፊት ከ3.3 ቢሊዮን ብር በላይ ትርፍ በማስመዝገብ ከሌሎች የግል ባንኮች ጋር ያለውን ልዩነት በማስፋት የመሪነት ሚናውን ለአራተኛ ጊዜ አረጋግጧል፡፡

ባንኩ በ2011 የሒሳብ ዓመት ያስመዘገበው የ3,329,766,285 ብር ትርፍን ልዩ የሚያደርገሀው በግል ባንኮች የትርፍ ምጣኔ ከፍተኛ መሆኑ ብቻ ሳይሆን በአንድ ዓመት የ1.36 ቢሊዮን ብር ወይም የ70 በመቶ ዕድገት የታየበት መሆኑ ነው፡፡ ባንኩ ባለፈው ዓመት በኢንዱስትሪው ውስጥ ከፍተኛ ተብሎ የተጠቀሰውን ሁለት ቢሊዮን ብር ማትረፉ የሚታወስ ሲሆን በዘንድሮው የሒሳብ ዓመት ያስመዘገበው ትርፍ ግን ከሌሎች የግል ባንኮች ጋር የነበረውን ልዩነት እጅጉን ያሰፋበት ነው፡፡

 የዘንድሮው የሒሳብ ዓመት አዋሽ ባንክ ከፍተኛ ትርፍ በማስመዝገብ ብቻ ሳይሆን በሌሎች ዘርፎችም ማለትም በደንበኞች ቁጥር፣ በተከፈለ ካፒታል፣ የተቀማጭ ገንዘብ መጠን፣ የባንኩ አስቀማጮች ቁጥርና ባንኩ ሰጠው የብድር መጠን  እንዲሁም በተያያዥ የኢንዱስትሪው መለኪያዎች አንፃር ከግል ባንኮች በቀዳሚነት የሚያስቀምጡት አፈፃፀሞችን ያስመዘገበበትም ነው፡፡ ለዚህም የባንኩ የ2011 የሂሳብ ዓመት የተቀማጭ ገንዘብ መጠን ከ62.2 ቢሊዮን ብር በላይ መድረሱ አንዱ ማሳያ እንደሆነና ይህም ካለፈው የሂሳብ ዓመት ጋር ሲነፃፀር የ16.3 ቢሊዮን ብር ወይም የ36 በመቶ ዕድገት ያሳየ መሆኑን የባንኩ ግርድፍ የሂሳብ ሪፖርት አመልክቷል፡፡ የባንኩ አስቀማጮች ቁጥርም 2.7 ሚሊዮን በላይ መድረሱም ተጠቁሟል፡፡

ባንኩ በ2011 የሂሳብ ዓመት መጨረሻ የሰጠው ብድር ከ47.1 ቢሊዮን ብር በላይ የደረሰ ሲሆን ይህም ባለፈው የሂሳብ ዓመት ከሰጠው 15.8 ቢሊዮን ብር ጋር ሲነፃፀር የ51 በመቶ ዕድገት አሳይቷል፡፡ በግርድፍ ሪፖርቱ ላይ እንደተመለከተው የባንኩ ዓመታዊ ገቢም  ከ5.4 ቢሊዮን ብር ወደ ስምንት ቢሊዮን ብር በማደግ  ካለፈው ዓመት የ2.5 ቢሊዮን ብር ብልጫ አሳይቷል፡፡  የባንኩ የተከፈለው የካፒታል መጠንም የ49 በመቶ ዕድገት በማሳየት ከ4.3 ቢሊዮን ብር በላይ የደረሰ ሲሆን  ይህም ከግል ባንኮች የመጀመርያውን ደረጃ እንዲይዝ አድርጎታል፡፡ ባንኩ በ2011 የሂሳብ ዓመት 2.6 ቢሊዮን ብር ለማትረፍ አቅዶ ነው ከ3.3 ቢሊዮን ብር በላይ ያተረፈው፡፡ የተመዘገበው አመርቂ ውጤት የሁሉም ሰራተኞችና የባንኩ አነመራሮች ድምር ውጤት መሆኑን እውቅና በመስጠት የባንኩ የዳሬክተሮች ቦርድ ለባንኩ ሰራተኞችና አመራሮች የሶስት ወር ደመወዝ በማትጊያነት በማበርከት የሶስት እርከን የደመወዝ ጭማርን ፈቅዷል፡፡ 

Share
Facebook
Twitter
LinkedIn
Telegram

Nov 28, 2023 EXCHANGE Rate
Currency Buying Selling
USD
55.6854 56.7991
GBP
67.1870 68.5307
EUR
60.9588 62.1780
AED
13.7216 13.9960
SAR
13.4363 13.7050
CHF
60.3764 61.5839

Exchange Rate
Close